शनिवार त्याच्या पिण्याचा हक्काचा वार असतो
आठवडाभर कष्ट मग हा दिवस निवांत मिळतो
तिच्या स्वप्नांचा मात्र हाच एक घातवार ठरतो
तो घरी येईपर्यंत तिचा जीव टांगणीला लागतो
हल्ली प्यायल्यावर ..त्याचा तोल देखील जातो
तोंडातील अभद्र शिव्यांनी तिचा जीव धस्तावतो
तिचा पडलेला चेहरा पाहून तो नेहमी कातावतो
काय कमी आहे तुला ...म्हणून जोराने ओरडतो
पूर्वी मात्र शनिवारी ती खूपच आनंदी असायची
फिरायला जायचे म्हणून नटून थटून बसायची
कधी काळी पितो म्हणून पापड भाजून द्यायची
त्याने चिअर्स केल्यावर ती कौतुकाने पहायची
आताशा फिरायला जायचा त्याचा मुडच नसतो
रात्री उशिरापर्यंत तो ...मस्त मित्रांमध्ये रमतो
ती मुलांना पोटाशी धरून बाल्कनीत उभी असते
त्याच्या येण्याच्या वाटेवर नजर अंथरून बसते
..तुषार नातू !
कोणत्याही टिप्पण्या नाहीत:
टिप्पणी पोस्ट करा